PITONG LETRA

Pag-ibig, isang salita ngunit maraming kahulugan

Pitong letra pero maraming naguguluhan

Ano nga ba ang salitang ito?

Bakit sobrang daming nalilito?

Ang pag-ibig ang rason kaya't lahat ay kayang hamakin

Ang buwan at mga tala sa langit ay kaya daw sungkitin

Mga dagat at ilog man ay kayang tawirin

Kahit matataas na bundok ay kayang akyatin

Dahil sa pag-ibig, maraming nasawi

Madaming umasa at naiba ang gawi

Ang dating matalino ay naging bobo

Kaya't puso ay madaling naibigay ng buo

Ngunit may kagandahan sa pag-ibig

Nagiging masaya kapag kasama ang iniibig

Lungkot at lumbay ay napapawi

Lalo na pag nakita ang mahal ay nakangiti

Marahil minsan sa pag-iibigan

Ay nagkakaroon ng alitan

Ngunit sa kabila ng 'di pagkakaunawaan

Pagsubok ang magpapatatag ng samahan

Ang pag-ibig ay 'di nangangailangan

Ng anumang mababaw o malalim na kahulugan

Ito'y kailangan lamang maramdaman at iparamdam

Nang may sinseridad at katotohanan

Kaya kung ikaw ay iibig ng isang tao

Pahalagahan mo at mahalin ng totoo

Dahil ang pag-ibig ay 'di laro bagkus dalisay

Gaya ni Jesus na nag-alay ng buhay

photo credit: http://www.nairaland.com/3473746/hypothesis-love